رسائل الغربة ” قصائد عامية ”

بقلم - احمد قنديل

فاكرين الغربة دي حاجه ساهلة
لا والله دا احنا ف الغربه شقيانين

وانتي ياحاجة فاطنة قاعدة تعدي
وعمالة تحسبي واتقولي بقاله سنين

مش شايفه عيالي عاملين كيف
مش شيفاهم من غيري كيف عايشين

مش شايفه الواد تاعب أمه ازاي
مش شايفة تاعبني ومخلي قلبي حزين

زمان كان فيه جوابات المسافر يبعتها
يطمن اهله عليه في سطر ولا اتنين

دلوقتى ياخالتي بقا فيه محمول
يوجعوا راسوا بالساعة وبالساعتين

وانتى شغاله حساب كل شويه
ده شغال بكام وده بعت الف ولا ألفين

بقولك ايه استني شويه الكفيل بينده
استر يارب اها قال انت فين ياحسين

دى ليلة مطينه بطين شافني وانا بتكلم
نقيتي ياختي شكلها فيها خصم يومين

ايوه ياطيب انا موجود اديني اها
موجود فين وانا زعقت عليك حسين

وكاله هي قاعد عمال تلت وتعجن
وانا اقول مش شايف شغلك زين

وانتى ياعمه بهية اديني بدور ع البراد
من ساعة ما قريت جوابك من شهرين

عايز اقولك مش ناسي واديني بدور
حتى وانا ماشي قابلني حلاق بيقولوا عليه زين

اما ادخل احلق راسي دا انا كنت ناسي
بص علي وقال ياعم اصبر قدامك نفرين

قولت وماله ساهله الحسبه شويه
إلا بعد شويه لقيتهم راحوا قايمين

سألت ايه اللي حصل ايه فيه ردو عليا
الناس دول مالهم قاموا كده مفزوعين

قام واحد بص بصه مش هيه
قال يعني مش عارف دول ياخوي مخالفين

"إلي الملتقي بإذن الله تعالي فى الجزء الثاني "